Թաթոյան․ Փաշինյանը հանձնարարել է եկեղեցականների կյանքի վերաբերյալ տեղեկություններ հավաքել
Եկեղեցու դեմ այս գործընթացն ունի միմիայն քաղաքական ուղղորդում։ Այս մասին դատարանի բակում լրագրողներին ասաց իրավապաշտպան Արման Թաթոյանը։
«Շատ ակնհայտ է, որ վարչապետը քաղաքական հրահանգներով ուղղորդում է իրավապահների գործողությունները։ Նա անթաքույց դա ցույց է տալիս։ Շատ դժվար է այս ամենը իրավական գործընթաց կոչել»,-ասաց Թաթոյանը։
Նա ընդգծեց, որ եթե Աջապահյանի դեմ քրեական վարույթ են հարուցել, հիմք ունենալով 2024 թվականի հայտարարությունը, ապա հարց է առաջանում, թե ինչու դա չէին անում մինչ օրս։ Թաթոյանը վստահ է, իրավապահները պարզապես հիմքեր չէին գտել վարույթ նախաձեռնելու։
«Հարց է առաջանում, թե ինչու այս վարույթը համընկավ իշխող կուսակցության ղեկավարի քաղաքական դիրքորոշումների հետ»,-ասաց նա։
Թաթոյանը շեշտեց, որ ՔՊ-ականները, թաքնվելով հավատավոր քրիստոնյանի շղարշի տակ, հստակ ատելության խոսք են տարածում, վարկաբեկում եկեղեցականներին, փորձում հեղինակազրկել Հայ առաքելական եկեղեցին։
Այս ամենի հետևանքն այն է, որ հասարակությունը պառակտվում է, անհանդուրժողականությունը մեծանում է և լուրջ անվտանգային խնդիրներ են առաջանում երկրի ներսում։ Նախկին ՄԻՊ–ը հավելեց, որ սա հստակ գնահատական է , հիմնված փաստերի վրա։
ՀՀ նախկին ՄԻՊ–ը լրագրողներին ասաց, որ Փաշինյանը իրավապահներին հանձնարարել է եկեղեցականների կյանքի վերաբերյալ տեղեկություններ հավաքել։ Իսկ այս տեղեկությունը նա ստացել է ԵՊՀ–ում վարչապետի հետ կայացած հանդիպման մասնակիցներից: «Համապատասխան մարմիններին հանձնարարվել է տեղեկատվություն հավաքել կաթողիկոսի անձնական կյանքի վերաբերյալ: Այս տեղեկատվությունը հայտնվել է հանրային ոլորտում և չի հերքվել»:
Թաթոյանը նկատեց, որ իշխանությունը ամենաբարձր մակարդակով խթանում է խտրականությունը, անհանդուրժողականությունը և հոգևորականության նկատմամբ թշնամանքը՝ օգտագործելով վարչական ռեսուրսները:
Sputnik Արմենիա