Ռուբիո․ Միացյալ Նահանգները դադարեցնում է USAID-ի միջոցով տրամադրվող արտաքին օգնությունը
ԱՄՆ Միջազգային զարգացման գործակալությունը (USAID) հուլիսի 1-ից պաշտոնապես կդադարեցնի իր արտաքին օգնության ծրագրերը։ Դրա մասին գրավոր հայտարարության մեջ նշել է ԱՄՆ պետքարտուղար Մարկո Ռուբիոն՝ ընդգծելով, որ Պետքարտուղարությունն այժմ կհսկի համապատասխան նախաձեռնությունները։
«Հուլիսի 1-ից ԱՄՆ Միջազգային զարգացման գործակալությունը պաշտոնապես կդադարեցնի իր արտասահմանյան օգնությունը, -ասված է հայտարարության մեջ։ -Ծրագրերը, որոնք «բխում են վարչակազմի քաղաքականությունից և առաջ են մղում ամերիկյան շահերը, կգտնվեն Պետքարտուղարության իրավասության ներքո»։ Ռուբիոն շեշտել է, որ Պետքարտուղարությունը կապահովի, որ այդ ծրագրերը իրականացվեն «ավելի մեծ հաշվետվողականությամբ, արդյունավետությամբ և կշռադատվածությամբ»։
Պետքարտուղարը շեշտել է, որ ԱՄՆ արտաքին քաղաքականությունը պետք է համապատասխանի «Ամերիկան առաջին հերթին» սկզբունքին։ «Ամերիկայի վաղեմի հանձնառությունը կենսականորեն կարևոր մարդասիրական օգնություն ցուցաբերելու և տնտեսական զարգացումը խթանելու հարցում պետք է արտացոլվի «Ամերիկան առաջին հերթին» արտաքին քաղաքականության մեջ», -ընդգծել է նա։ Միևնույն ժամանակ, Ռուբիոն համոզմունք է հայտնել, որ հարկատուների միջոցները չպետք է ծախսվեն «հեռավոր երկրներում ձախողված կառավարություններին ֆինանսավորելու» վրա։ Ապագայում, հավելել է նա, «մեր օգնությունը կլինի նպատակային և ժամանակի սահմանափակմամբ»։
USAID-ին ուղղված իր քննադատության մեջ Ռուբիոն շեշտել է, որ գործակալությունը տարիներ շարունակ ունեցել է «գրեթե անսահմանափակ հարկատուների բյուջե», սակայն Սառը պատերազմից ի վեր «նշանակալի արդյունքների չի կարողացել հասնել»։ Նա նշել է նաև, որ «զարգացման նպատակները հազվադեպ էին իրականացվում, անկայունությունը հաճախ սրվում էր, իսկ հակաամերիկյան տրամադրությունները միայն աճում էին»։ Նա նշել է, որ այն երկրները, որոնք ստացել են ամերիկյան զգալի քանակությամբ օգնություն, «սովորաբար նույնկերպ չեն արձագանքում»։
Գործակալության աշխատանքի փաստացի կասեցումը տեղի է ունեցել փետրվարի 3-ին։ Այդ որոշումը, ինչպես նշվում է, ընդունվել է ձեռնարկատեր Իլոն Մասկի նախաձեռնությամբ, որը մինչև վերջերս վերահսկում էր դաշնային վարչակազմի արդյունավետության բարելավման դեպարտամենտը։ Նրա պարտականությունների մեջ էին մտնում բյուրոկրատիայի կրճատումը, պետական ծախսերի օպտիմալացումը և գերծանրաբեռնված ապարատի դեմ պայքարը։ Չնայած անկախ գործակալության պաշտոնական կարգավիճակին, USAID-ն իրականում գործում է Պետքարտուղարությանն առընթեր։
News.am