Զախարովա․ Հայաստանի համար սարսափելի տեղեկատվական արշավ է տարվում, բայց ի՞նչ կապ ունի ՌԴ-ն դրա հետ
Սա ակնհայտորեն սարսափելի տեղեկատվական արշավ է Հայաստանի և հայ ժողովրդի համար։ Այս մասին ճեպազրույցի ժամանակ հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան՝ մեկնաբանելով Հայ եկեղեցու շուրջ տեղի ունեցող գործընթացները։
«Ինչո՞ւ։ Որովհետև դա պառակտում է հասարակությունը Հայաստանում։ Սա վերաբերում է այն արժեքներին և բաներին, որոնք միշտ միավորել են հայերին և օգնել են հաղթահարել դժվարին՝ երբեմն նույնիսկ սարսափելի փորձությունները, որոնք բաժին են հասել հայ ժողովրդին։
Եվ հիմա հանկարծ այս հիմնարար, անվիճելի արժեքները (հավատքը, կրոնը, եկեղեցին) արհեստականորեն դառնում են գրեթե կռվախնձոր։
Դա արհեստականորեն ներդրված խտրականություն է ոչ միայն Հայաստանում, այլև ամբողջ աշխարհում ապրող մարդկանց շրջանում, որոնք ներգրավված են հայկական մշակույթում և պատմության մեջ։
Այս ամենը, չգիտես ինչու, կապվում է Ռուսաստանի հետ։ Ի՞նչ կապ ունի Ռուսաստանը դրա հետ։
Եթե կան հարցեր ներքին գործերի վերաբերյալ, ապա սա ներքին պատմություն է։ Բայց այստեղ ամեն ինչ խառն է։ Մի կողմից, հայ եկեղեցու ներկայացուցիչների դեմ մեղադրանքներ են հնչել, մյուս կողմից՝ ի՞նչ կապ ունի Ռուսաստանը դրա հետ։
Ռուսաստանը անկեղծորեն շահագրգռված է եղբայրական Հայաստանի կայունությամբ, պարզապես այն պատճառով, որ դա մեզ ձեռնտու է։ Դա ոչ միայն բարձր գաղափարների հարց է, թեև առաջին հերթին հենց դա է, սակայն դա նաև միևնույն ժամանակ՝ շահավետ է։
Կայուն, բարգավաճ, զարգացող Հայաստան՝ իր կայուն զարգացմամբ, ահա թե ինչպիսին մենք կցանկանայինք տեսնել այս պետությունն ու այս ժողովրդին։
«Մենք կողմ ենք Սահմանադրության վրա հիմնված օրենքների պահպանմանը, քաղաքացիների, այդ թվում՝ կրոնական, իրավունքների և ազատությունների ապահովմանը, հատկապես այն դեպքում, երբ իշխանությունները այս մասին այդքան հրապարակայնորեն խոսել են և դա դարձրել են իրենց նախընտրական քարոզարշավի մաս», - նշել է Զախարովան։
News.am