Սփյուռքն ապշած և վրդովված է Հայաստանում տեղի ունեցողից․ Կանադայի հայոց թեմի առաջնորդ
Սփյուռքն ապշած և վրդովված է այն ամենից, ինչ տեղի է ունենում Հայաստանում եկեղեցու շուրջ։ Այս մասին Էջմիածնում Sputnik Արմենիայի թղթակցի հետ զրույցում հայտնեց Կանադայի հայոց թեմի առաջնորդ Տեր Աբգար եպիսկոպոս Հովակիմյանը։
«Մեզ համար անհասկանալի և անընդունելի է, մեր ժողովրդի, հոգևորականության և սփյուռքի համար դատապարտելի է նման խոսույթը, որ այսօր հայաստանյան դաշտում է։ Այդ խոսույթը շատ խորթ է թե մեր ազգի, թե եկեղեցու համար»,- ասաց հոգևորականը։
Շեշտում է՝ նա, ով խոսում է իբրև թե եկեղեցու բարեփոխումների մասին, պետք է հստակ տարբերակի՝ դրանք բարեփոխումներ են, թե հեղափոխումներ։
«Բարեփոխումները պետք են և անհրաժեշտ են, դրանք մենք ինքներս էլ ենք նախաձեռնում։ Եկեղեցական տարբեր բարեփոխումների առաջարկողը հենց մեր վեհափառ հայրապետն է՝ մեր ազգընտիր կաթողիկոսը, որը մի շարք բարեփոխումներ է արել և անում մեր եկեղեցում»,- նշեց Տեր Աբգար եպիսկոպոս Հովակիմյանը։
Ըստ նրա՝ զանազան խնդիրների լուծումը գտնելու համար եպիսկոպոսաց դասը հավաքվում է, քննարկում և լուծումներ առաջարկում։ Եկեղեցական գործերի ընթացակարգը հստակ է, որն արդեն դարեր շարունակ գոյություն ունի։
«Կա Ազգային եկեղեցական ժողով, Եպիսկոպոսաց ժողով, որն այդ տեսակ և նման հարցերով լուծումներ տալիս են և դարեր շարունակ տվել են։ Ստեղծել նոր, անհասկանալի ընթացակարգեր, որոնք չգիտես՝ ում կողմից են առաջադրվում, անհեթեթ է»,- նշեց եպիոսկոսը։
Ինչ վերաբերում է երկու սրբազաններին առաջադրվող մեղադրանքներին՝ Կանադայի հայոց թեմի առաջնորդը նշեց՝ ժամանակն ամեն ինչ ցույց կտա, սակայն ինքը շարունակում է լինել իր հոգևոր եղբայրների կողքին։