ՀՅԴ․ Նռնակը հայտնաբերվել է պատերազմների մասնակցի տանը

ՀՀ քննչական կոմիտեն մարտական նռնակ է հայտնաբերել 2016 և 2020 թթ. պատերազմների, ինչպես նաև 2022 թ. Ջերմուկի ռազմական գործողությունների մասնակցի տանը։ Այս մասին հայտնում է ՀՅԴ Հայաստանի Գերագույն մարմինը։

Ավելի վաղ ՀՅԴ Հայաստանի Գերագույն մարմնի հանրային կապերի գրասենյակը հրապարակել էր նռնականման առարկայի լուսանկար՝ հիշեցնելով, որ այն նախատեսված է սթրայքբոլ հայտնի տակտիկական, սպորտային խաղի համար, ու շեշտել, որ այսօր դաշնակցականների տների խուզարկության արդյունքում որևէ ապօրինի առարկա չի հայտնաբերվել։ Քննչական կոմիտեն հակադարձել էր` հայտարարելով, որ կատարված խուզարկությունների ընթացքում առգրավված նռնակը «Ֆ1» տեսակի մարտական նռնակ է, ռազմամթերք են նաև 2 էլեկտրական անդրապայթիչները (դետոնատորները)։

«Պատերազմների մասնակցի շահերի պաշտպանությանը փաստաբան ներգրավված չի եղել, և հնարավոր չի եղել ապահովել քննչական գործողությունների օրինական ընթացքը, նրա տանը հայտնաբերվել է մեկ նռնակ, որով ակնհայտ է` անհնար է իրականացնել ձերբակալված անձանց վերագրվող ահաբեկչական գործողությունները»,– ասված է հայտարարության մեջ։

Հիշեցնենք` առավոտյան խուզարկություններ են իրականացվել դաշնակցականների տներում, որից հետո 7 անձ ձերբակալվել է և տարվել ՀՀ քննչական կոմիտե։ 3 ժամից ավելի փաստաբաններին թույլ չէին տալիս մուտք գործել շենք ու հանդիպել վստահորդների հետ, անգամ ՄԻՊ–ի միջամտությունից հետո իրավիճակը չփոխվեց։ Ժամեր անց փաստաբանները լրագրողների հետ զրույցում հայտարարեցին, որ հեռանալու որոշում են կայացրել, քանի որ այն, ինչ կատարվում է, իրավական գործընթաց չէ։

Sputnik Արմենիա