Գուրգեն Մելիքյան․ Արցախի հարցը փակված չէ, վերադարձ լինելու է

«Իրենց առաքելությունն է դա, մեր առաքելություն է՝ պայքարել Արցախի հարցը չփակվելու համար»,- այս մասին «Արցախյան բանակցություններ» գրքի շնորհանդեսի ընթացքում լրագրողների հետ զրույցում ասաց արևելագետ Գուրգեն Մելիքյանը՝ պատասխանելով հարցին,թե արդյո՞ք գրքի ուղերձները տեղ կհասնեն օրվա իշխանություններին։

«Արցախի հարցը փակված չէ։ Ապացույցն այն է, որ այսօր աշխարհի շատ երկրներում, այդ թվում՝ Ամերիկայում, խոսում են այդ մասին, որ վերադարձը լինելու է։ Մենք պետք է փայփայենք այդ գաղափարը, որ վերադարձը լինի, պետք է մեր եղբայրներին ու քույրերին սատար կանգնենք, որ հայրենիքը չլքեն և վերադառնան իրենց ծննդավայրերը։ Սա է մեր առաքելությունը, ու առաքելությունը տրված է վերուստ, նա պետք է զինվորագրված լինի հայոց գործին»,- ասաց Մելիքյանը։

Նշենք, որ այսօր տեղի ունեցավ ԱԺ պատգամավոր Արթուր Խաչատրյանի հեղինակած «Արցախյան բանակցություններ» գրքի շնորհանդեսը։ Երկհատորյակում վերլուծության են ենթարկվել Արցախի հիմնահարցի կարգավորման շուրջ ընթացած քաղաքական բանակցությունները՝ դրանց պատմությունը, ընդունված որոշումները, ինչպես նաև ներկայացված կարգավորման տարբեր առաջարկները։ Աշխատությունն ընդգրկում է նաև համեմատական ակնարկներ այլ միջազգային հակամարտությունների կարգավորման փորձերից, ինչպես նաև դեպքեր ու իրադարձություններ, որոնք, թեև անմիջականորեն բանակցային գործընթացի մաս չեն կազմել, սակայն էական ազդեցություն են ունեցել դրա ընթացքի վրա։

Panorama.am