Կամո Արեյանն ասաց` ինչու էր վերջին անձրևից հետո Երևանը կրկին հեղեղվել

Հուլիսի 25-ի երեկոյան մայրաքաղաք Երևանում ամսվա նորման 2 անգամ գերազանցող անձրև է տեղացել: Այսօր գործակարգավարական խորհրդակցության ժամանակ ասաց Երևանի քաղաքապետի խորհրդական Կամո Արեյանը` անդրադառնալով մայրաքաղաքի փողոցներ հեղեղումներին: Նրա խոսքով՝ հուլիս ամսվա նորման 9 մմ է, սակայն 20 րոպեի ընթացքում տեղումները գերազանցել են 18 մմ-ը:

«Այս ինտենսիվ տեղումների պայմաններում, որքան էլ թողունակ ու գործարկման ենթակա լինի համակարգը, չէր կարող ամբողջ անձրևը համակարգը քաշել: Հետևաբար, մայրաքաղաքի գրեթե ամբողջ տարածքում` հորդառատ անձրևի ընթացքում հեղեղվել էին փողոցները, մայթերը, ստորգետնյա տրանսպորտային հանգույցների հատվածները»,– ասաց Կամո Արեյանը:

Նա ներկայացրեց տվյալներ. այդ օրը մայրաքաղաքում ջրային կտակումների 20 դեպք է գրանցվել. խնդրահարույց են դարձել Հաղթանակի կամուրջը, Քրիստափորի փողոցում մետրոպոլիտենի դիմացի հատվածը, ինչպես նաև մետրոյի «Գործարանային» կանգառի մոտ, Բաբաջանյան–Իսակով հատվածը, փողոցներից խնդրահարույց են դարձել Գյուրջյանը, Օրբելին, գրանցվել են ծառերի և ճյուղերի տապալման 15 և էլեկտրասյուների տապալման և բռնկման 25 դեպքեր, տանիքների փլուզման 5 դեպք, քարաթափման` 4։

Արեյանի խոսքով` անձրևի դադարից հետո, սակայն, հեղեղատար համակարգն ամբողջությամբ աշխատել է, ու փողոցներում կուտակված անձրևաջուր չի եղել։

Նշենք, որ հուլիսի 25–ի ուժեղ անձրևից հետո երևանցիները սոցցանցերում տեսանյութեր էին տարածում, որտեղ երևում էր, որ քաղաքի փողոցներն ու անցումները հեղեղվել են։

Sputnik Արմենիա