ՀՀ նախագահ․ Եթե բացենք Սյունիքի դարպասները, ապագան մեծ հնարավորություններ է տալու մեզ

Եթե բացենք Սյունիքի դարպասները, ապագան մեծ հնարավորություններ է տալու մեզ։ Այս մասին հայտարարել է ՀՀ նախագահ Վահագն Խաչատուրյանը Սյունիքի մարզում, որտեղ մեկնել էր եռօրյա աշխատանքային այցով։ Տեղեկությունը հայտնում է ՀՀ նախագահի մամուլի ծառայությունը։

«Սյունիքը մեր զարգացման դարպասներն են դառնալու։ Եթե մենք կարողանում ենք Սյունիքի դարպասները բացել, ես նկատի ունեմ 43 կմ հնարավորությունը, ուրեմն վստահ եղեք, որ ապագան զարգացման առումով շատ մեծ հնարավորություններ է մեզ տալու»,– հայտարարել է Խաչատուրյանը խորհրդակցության ժամանակ, որին մասնակցել են Սյունիքի մարզպետ Ռոբերտ Ղուկասյանը, տարածքային կառավարման և ենթակառուցվածքների նախարար Դավիթ Խուդաթյանը, ուժային կառույցների ներկայացուցիչներ և մարզի համայնքների ղեկավարներ։

ՀՀ նախագահը նշել է նաև, որ իր անձնական շփումների արդյունքում հասկացել է, որ «Խաղաղության խաչմերուկը» լավ է ընկալվում միջազգային հանրության կողմից, և ՀՀ իշխանությունների նպատակն է մոտ ժամանակներում ստորագրել խաղաղության համաձայնագիրը։

Խաչատուրյանը հետաքրքրվել է մարզում տիրող ընդհանուր իրավիճակով, այդ թվում՝ սոցիալ–հոգեբանական մթնոլորտով, որի վերաբերյալ զեկուցումներով հանդես են եկել ուժային կառույցների ներկայացուցիչները և համայնքների ղեկավարները։

Sputnik Արմենիա