Ավետիք Քերոբյան․ Նոր պայմանագրեր են նախատեսված
«Բանակ-2019» միջազգային ռազմատեխնիկական համաժողովում Հայաստանի և Ռուսաստանի Ռազմաարդյունաբերական համալիրի ընկերությունները պայմանագրեր են ստորագրել և նախատեսում են ևս մի քանի գործարք կնքել ռազմական նշանակության արտադրանքի մատակարարումների շուրջ: Այս մասին «Զվեզդային» ասել է Հայաստանի ՌԱՀ նախագահ Ավետիք Քերոբյանը:
«Հիմա տեխնիկական համագործակցությունն անչափ դինամիկ է զարգանում, Ռուսաստանի հետ ստորագրվել են և նախատեսվում են ստորագրել ռազմական նշանակության արտադրանքի մատակարարումների նոր պայմանագրեր: Դե, որպես Ռազմաարդյունաբերական կոմիտե՝ մենք զբաղվում ենք այդ համագործակցության ռազմաարդյունաբերական ասպեկտով: Մենք Հայաստանի և Ռուսաստանի ձեռնարկությունների միջև կապերի զարգացման մշակումներ ունենք, և արդեն այս ուղղությամբ ձեռնարկված կոնկրետ քայլեր կան»,- հայտարարեց նա:
Քերոբյանը խոսել է նաև արտադրանքի մասին, որը Հայաստանը համաժողով է բերել՝ «Պատիրոտ» կենտրոն: Նրա խոսքով՝ երկրի վահանակին ներկայացված են Հայաստանի ՌԱՀ ընկերությունների քառորդ մասը:
«Ներկայացված է ամենատարբեր սպեկտրի արտադրանք՝ զինվորական հանդերձանք (զինվորական համազգեստ, զրահաբաճկոններ, զինվորական կոշիկ), հրազեն, ռազմամթերք, ներկայացված է նաև միանգամայն նոր տեխնիկա՝ ջերմատեսներ, օպտիկա, լազերային և ռադիոտեղորոշման սարքավորումներ»,- նշեց Հայաստանի ՌԱՀ նախագահը:
Քերոբյանն ընդգծել է, որ Հայաստանը համաժողովը դիտարկում է որպես արդյունավետ հարթակ, որտեղ կարելի է տարբեր երկրների հետ միջազգային համագործակցության մասին պայմանավորվել:
««Բանակ» համաժողովը մենք դիտարկում ենք որպես ռազմա-տեխնիկական համագործակցության զարգացման առավել արդյունավետ միջոց ոչ միայն ՌԴ-ի, այլ նաև այն երկրների հետ, որոնք ավանդաբար մասնակցում են այս համաժողովի աշխատանքներին: Ապագայում պարտադիր մտադիր ենք մասնակցել այս համաժողովի հետագա աշխատանքներին, և ակնկալում ենք «Բանակի» ձևաչափի հետագա զարգացումը»,- ասել է Ավետիք Քերոբյանը:
«Բանակ-2019» միջազգային ռազմատեխնիկական համաժողովն անցկացվում է հունիսի 25-ից հունիսի 30-ը ԶՈՒ «Պատրիոտ» կենտրոնում Կուբինկա օդանավակայանում և Ալաբինո զորավարժարանում, ինչպես նաև բոլոր ռազմական շրջաններում և Հյուսիսային նավատորմում, տեղեկացնում է NEWS.am-ը:
