Բռնության կոչերը վերածվել են տեխնոլոգիայի
Փաշինյանի ագրեսիվ հայտարություններից հետո սոցցանցում բռնության կոչերի 200 տոկոսանոց աճ է գրանցվել: Հուլիսի 19-ին «Բռնության և ատելության խոսք» թեմայով քննարկմանն այս մասին ասաց «Քաղաքացիական գիտակցություն» հկ ղեկավար Նարեկ Սամսոնյանը:
Նրա խոսքով՝ դա արդեն վերածվել է տեխնոլոգիայի, որում ներգրավված են նաև կանայք:
«Կան մարդիկ, որոնք համացանցում նպատակաուղղված մթնոլորտ են ստեղծում այս կամ այն գործչին վիրավորելու համար: Ցանցում ատելության դոզան անցյալ տարվա համեմատ ակնհայտ աճել է: Գործն անգամ հասել է նրան, որ սպառնալիքներ են հնչում Սերժ Սարգսյանի թոռնուհու հասցեին », - ասաց նա:
Նարեկ Սամսոնյանը հավելեց, որ ամբողջ հասարակությունը պատասխանատու է այսպիսի իրավիճակի համար, այդ թվում քաղաքական ուժերը, որոնք անցյալ տարի չէին արձագանքել մի կուսակցության ներկայացուցիչների նկատմամբ բռնության կոչերին:
«Նման լռություն է հետևում է նաև այն ժամանակ, երբ Փաշինյանն ասում է, որ Ղարաբաղում պատերազմը դավադրության արդյունք էր: Երբ առաջին դեմքն իրեն վիրավորանքներ է թույլ է տալիս իր քաղաքական տարածքը մաքրելու համար, նրա հանդուրժողականության մասին կոչերը այնքան էլ ճշմարտանման չեն թվում», - ասաց նա, տեղեկացնում է News.am-ը:
