Ֆրանսիան աշխատում է Սիրիայի հյուսիս-արևելքում Թուրքիայի և քրդերի միջև համաձայնություն գտնելու ուղղությամբ, չորեքշաբթի ասել է Ֆրանսիայի արտաքին գործերի նախարար Ժան-Նոել Բարոն՝ հավելելով, որ քրդերը պետք է մասնակցեն ցանկացած քաղաքական անցումային գործընթացի, հայտնում է Reuters-ը։

Վրաստանի նախագահ Սալոմե Զուրաբիշվիլին, ելույթ ունենալով Եվրախորհրդարանում, Եվրոպային և Եվրամիությանը կոչ է արել «գործել հնարավորինս արագ»՝ օգնելու համար կարգավորել Վրաստանի ճգնաժամը, գրում է «Новости-Грузия»-ն:

Ռուսաստանի նկատմամբ Վրաստանի կուրսի փոփոխությունը և ԵՄ-ին անդամակցելու շուրջ բանակցությունների դադարեցումը կազդեն Հայաստանի եվրոպական ապագայի վրա, հայտարարել է Վրաստանի նախագահ Սալոմե Զուրաբիշվիլին՝ ելույթ ունենալով Եվրախորհրդարանում։

Հալեպում ՀՀ գլխավոր հյուպատոսությունը դեկտեմբերի 19-ից կվերսկսի աշխատանքը։ Տեղեկությունը հայտնում է ՀՀ արտգործնախարարությունը։

Հայաստանի տնտեսական աճը միջնաժամկետ հեռանկարում աստիճանաբար կնվազի և կհասնի մինչև տարեկան 4,5 տոկոս, թեև տնտեսության բարեփոխումների շարունակումը (հարկերի հավաքագրման աճ և ծախսերի ավելի արդյունավետ կառավարում) կարող է մեծացնել աճի ներուժը: Այս մասին ասվում է Արժույթի միջազգային հիմնադրամի (ԱՄՀ) հերթական զեկույցում՝ ՀՀ բյուջետային դեֆիցիտը լրացնելու նպատակով 2022 թվականի դեկտեմբերին կնքված Stand-By վարկային համաձայնագրի շրջանակներում։

Շվեյցարիայի Դաշնային ժողովի ստորին պալատը՝ Ազգային խորհուրդը, ընդունել է պատմական բանաձև՝ երկրի կառավարությանը կոչ անելով հրավիրել միջազգային ֆորում՝ նպաստելու և խթանելու Արցախից բռնի տեղահանված բնիկ հայ բնակչության վերադարձի իրավունքի իրացումը։ Շվեյցարիայի Ազգային խորհրդի արտաքին հարաբերությունների հանձնաժողովի կողմից ներկայացված միջնորդությունը կոչ է անում ուղիղ բաց երկխոսություն սկսել արցախահայության ներկայացուցիչների և Ադրբեջանի իշխանությունների միջև և վկայակոչում է միջազգային հանրության անհերքելի պատասխանատվությունը՝ իրենց պատմական հայրենիք տեղահանվածների ապահով վերադարձի երաշխավորման հարցում։

Թուրքիայի խորհրդարանի նախագահ Նուման Քուրթուլմուշը խոսել է «Զանգեզուրի միջանցքի» մասին։

Կուրսկի մարզում «մի քանի հարյուր» հյուսիսկորեացի զինվորներ, որոնք կռվում էին Ռուսաստանի համար, վիրավորվել կամ սպանվել են, The Associated Press-ին հայտնել է ամերիկացի բարձրաստիճան պաշտոնյան: Նրա խոսքով՝ ԿԺԴՀ զինվորականները զգալի կորուստներ են կրել, քանի որ ռազմական գործողություններին մասնակցելու փորձ չունեն։ Միևնույն ժամանակ գործակալության զրուցակիցը չի կարողացել հստակեցնել, թե Հյուսիսային Կորեայի քանի զինվոր է մահացել։

ՍԴ նախկին նախագահ, ՍԴ դատավոր Հրայր Թովմասյանի դատավճիռը բողոքարկվել է։ Դատախազությունը պահանջում է բեկանել՝ վաղեմության ժամկետներն անցած լինելու հիմքով Թովմասյանին պատասխանատվությունից ազատելու մասին վճիռը և դատապարտել նրան ազատազրկման՝ 7 տարի ժամկետով, իսկ Հրայր Թովմասյանի պաշտպաններն արդարացում են պահանջում։ «Դատալեքս» դատական-տեղեկատվական համակարգի համաձայն՝ բողոքները կքննվեն Հակակոռուպցիոն վերաքննիչ դատարանի դատավոր Արմեն Հովհաննիսյանի նախագահությամբ, կազմով՝ դատավորներ Մեսրոպ Մակյանի և Ժենյա Մելիքսեթյանի։