Շվեյցարիայի Դաշնային ժողովի ստորին պալատը՝ Ազգային խորհուրդը, ընդունել է պատմական բանաձև՝ երկրի կառավարությանը կոչ անելով հրավիրել միջազգային ֆորում՝ նպաստելու և խթանելու Արցախից բռնի տեղահանված բնիկ հայ բնակչության վերադարձի իրավունքի իրացումը։ Շվեյցարիայի Ազգային խորհրդի արտաքին հարաբերությունների հանձնաժողովի կողմից ներկայացված միջնորդությունը կոչ է անում ուղիղ բաց երկխոսություն սկսել արցախահայության ներկայացուցիչների և Ադրբեջանի իշխանությունների միջև և վկայակոչում է միջազգային հանրության անհերքելի պատասխանատվությունը՝ իրենց պատմական հայրենիք տեղահանվածների ապահով վերադարձի երաշխավորման հարցում։

Թուրքիայի խորհրդարանի նախագահ Նուման Քուրթուլմուշը խոսել է «Զանգեզուրի միջանցքի» մասին։

Կուրսկի մարզում «մի քանի հարյուր» հյուսիսկորեացի զինվորներ, որոնք կռվում էին Ռուսաստանի համար, վիրավորվել կամ սպանվել են, The Associated Press-ին հայտնել է ամերիկացի բարձրաստիճան պաշտոնյան: Նրա խոսքով՝ ԿԺԴՀ զինվորականները զգալի կորուստներ են կրել, քանի որ ռազմական գործողություններին մասնակցելու փորձ չունեն։ Միևնույն ժամանակ գործակալության զրուցակիցը չի կարողացել հստակեցնել, թե Հյուսիսային Կորեայի քանի զինվոր է մահացել։

ՍԴ նախկին նախագահ, ՍԴ դատավոր Հրայր Թովմասյանի դատավճիռը բողոքարկվել է։ Դատախազությունը պահանջում է բեկանել՝ վաղեմության ժամկետներն անցած լինելու հիմքով Թովմասյանին պատասխանատվությունից ազատելու մասին վճիռը և դատապարտել նրան ազատազրկման՝ 7 տարի ժամկետով, իսկ Հրայր Թովմասյանի պաշտպաններն արդարացում են պահանջում։ «Դատալեքս» դատական-տեղեկատվական համակարգի համաձայն՝ բողոքները կքննվեն Հակակոռուպցիոն վերաքննիչ դատարանի դատավոր Արմեն Հովհաննիսյանի նախագահությամբ, կազմով՝ դատավորներ Մեսրոպ Մակյանի և Ժենյա Մելիքսեթյանի։

Ուկրաինական բանակը ուժ չունի վերադարձնելու Դոնբասը և Ղրիմը, որը գրավել է Ռուսաստանը, սակայն Կիևը չի կարող հրաժարվել այդ տարածքներից, հայտարարել է Ուկրաինայի նախագահ Վլադիմիր Զելենսկին։

Իրավիճակը Կովկասում շարունակում է մնալ բարդ, և արտատարածաշրջանային խաղացողները, ինչպիսիք են ԱՄՆ-ն և Եվրամիությունը, կործանարար ազդեցություն ունեն դրա զարգացման վրա: Այս մասին օտարերկրյա պետությունների ռազմական կցորդների համար ճեպազրույցում հայտարարել է ՌԴ ԶՈւ գլխավոր շտաբի պետ Վալերի Գերասիմովը։

Հովիկ Աղազարյանի որդին՝ Հովսեփ Աղազարյանը, ազատվել է Էկոնոմիկայի նախարարության գործերի կառավարման վարչության պետի խորհրդականի պաշտոնից: Այս մասին տեղեկությունը NEWS.am-ի հետ զրույցում հաստատել են էկոնոմիկայի նախարարությունից:

Ոչ մի, այսպես կոչված, «Զանգեզուրի միջանցք» չի լինելու, լրագրողներին ասել է Հայաստանի փոխվարչապետ Մհեր Գրիգորյանը։ Այսպես է պաշտոնյան պատասխանել այդ «միջանցքի» անհրաժեշտության մասին Բաքվից և Անկարայից չդադարող հայտարարությունները մեկնաբանելու խնդրանքին։

ԵԱՏՄ–ին Հայաստանի Հանրապետության անդամակցությունը չի խանգարում ԵՄ երկրներից ներդրումներ անելուն և արտահանմանը։ Այս մասին «Տնտեսական և քաղաքական առաջնահերթություններ» խորագրով քննարկման ժամանակ ասաց փոխվարչապետ Մհեր Գրիգորյանը։