Տասնյակ երկրներ միացել են ԱՄՆ-ի և ԵՄ-ի՝ մեթանի արտանետումները 30%-ով կրճատելու պարտավորությանը

Տասնյակ երկրներ միացել են ԱՄՆ-ի և ԵՄ-ի՝ մեթանի արտանետումներն այս տասնամյակում 30%-ով կրճատելու պարտավորությանը, հաղորդում է AFP-ը։ Նախաձեռնությունը, որը փորձագետների կարծիքով կարող է հզոր կարճաժամկետ ազդեցություն ունենալ գլոբալ տաքացման վրա, հաջորդել է հայտարարությանը, որով ավելի քան 100 երկրներ համաձայնել են դադարեցնել անտառահատումները մինչև 2030 թվականը:

«Ամենակարևոր բաներից մեկը, որ մենք կարող ենք անել 2030-ին, ջերմաստիճանը 1,5 ° C-ում պահելու համար, մեթանի արտանետումները հնարավորինս արագ նվազեցնելն է»,-ասել է ԱՄՆ նախագահ Ջո Բայդենը՝ նկատի ունենալով 2015 թվականի Փարիզի համաձայնագիրը: Նա խոստումը, որն այժմ ստորագրվել է ավելի քան 80 երկրների կողմից, անվանել է «խաղի կանոնները փոխող խոստում», որն ընդգրկում է այն երկրները, որոնց բաժին է ընկնում աշխարհի մեթանի արտանետումների մոտ կեսը:

Եվրահանձնաժողովի ղեկավար Ուրսուլա ֆոն դեր Լյայենը հայտարարել է, որ մեթանի արտանետումների կրճատումը «անմիջապես կդանդաղեցնի կլիմայի փոփոխությունը»։ «Մենք չենք կարող սպասել մինչև 2050 թ., մենք պետք է արագ կրճատենք արտանետումները»,-ասել է նա։

Անցած ամիս ՄԱԿ-ը հայտարարել է, որ մեթանի համաշխարհային արտանետումները կարող են կրճատվել 20 տոկոսով՝ քիչ ծախսերով կամ առանց ծախսերի՝ օգտագործելով գոյություն ունեցող մեթոդները կամ տեխնոլոգիաները, տեղեկացնում է News.am-ը։