Թուրքիայում ՌԴ դեսպան․ Հայաստանի և Թուրքիայի միջև հարաբերությունների կարգավորման «սրբազան ժամկետ» չկա

Հայաստանի և Թուրքիայի միջև հարաբերությունների կարգավորման գործընթացը դրական բնույթ է կրում։ Կողմերն աշխատում են դիրքերի մերձեցման ուղղղությամբ, բայց աշխատանքի ավարտի ժամկետի մասին խոսելն առայժմ վաղ է։ Այս մասին ասել է Թուրքիայում Ռուսաստանի դեսպան Ալեքսեյ Երխովը կլոր սեղանի ժամանակ, որը տեղի է ունենում «Վալդայ» միջազգային բանավիճային ակումբի հարթակում, տեղեկացրել է «Սպուտնիկ»-ը։

«Նման աշխատանք այժմ կատարվում է, բայց որևէ կոնկրետ ժամկետ, կոնկրետ, ինչպես ասում են, «սրբազան ամսաթիվ» այստեղ չկա։ Գործընթաց կա, գործընթացը դրական է։ Հույս ունենանք, որ այն կզարգանա ճիշտ և անհրաժեշտ ուղղությամբ»,- ասել է ռուս դիվանագետը։

Ըստ նրա՝ «խոսք է եղել այն մասին, որպեսզի այս ամռանը, այսինքն՝ զբոսաշրջային սեզոնին, սահմանը բացվի, ասենք, երրորդ պետությունների քաղաքացիների համար»։ Սակայն կոնկրետ պայմանավորվածություններ այս հաշվով դեռ չկան, նշել է Երխովը։

Ռուս դեսպանը ուշադրություն է հրավիրել դրական ազդակի վրա, որը տրվել է Անկարայի և Երևանի հարաբերություններին «երկրաշարժի դիվանագիտությամբ»։

«Այստեղ այժմ այդպես են անվանում հումանիտար օգնությունը։ Այդ օգնությունը, որը Թուրքիային ցուցաբերել է Հայաստանը, օգնել է հավելյալ քայլեր անել երկկողմ հարաբերությունների կարգավորման ուղղությամբ»,- ասել է դեսպանը։

News.am