Գրիգորյան․ Հայաստանն այս փուլում չի դիտարկում ԲՐԻԿՍ-ին անդամակցելու հարցը

Հայաստանի կառավարությունն այս փուլում չի քննարկում ԲՐԻԿՍ-ին անդամակցելու հարցը։ Այս մասին խորհրդարանում լրագրողների հետ զրույցում ասաց ՀՀ փոխվարչապետ Մհեր Գրիգորյանը։

Նրա խոսքով ՝ ՀՀ–ն կմասնակցի հոկտեմբերի 22-24-ը Կազանում կայանալիք ԲՐԻԿՍ–ի գագաթնաժողովին, սակայն այժմ դժվար է գնահատել ԲՐԻԿՍ-ին անդամակցության հեռանկարները:

«ԲՐԻԿՍ - ի շրջանակում կոնսոլիդացիայի շուրջ դեռևս այնքան քննարկումներ պետք է տեղի ունենան, որպեսզի մեզ և ձեզ համար հասկանալի լինի, թե դա ինչ գործընթաց է, կլինի այն, թե չի լինի։ ԲՐԻԿՍ–ը շատ բարդ կոնսոլիդացիա ունի»,– ասաց նա։

Ավելի վաղ Հայաստանի կառավարությունը հաստատել էր, որ ՀՀ վարչապետ Նիկոլ Փաշինյանը կմասնակցի ԲՐԻԿՍ–ի գագաթնաժողովին։

Միջոցառմանը կմասնակցեն 33 միջազգային պատվիրակություններ, այդ թվում` առնվազն 26 պետությունների ղեկավարներ: Թաթարստանի մայրաքաղաք մեկնելու համաձայնություն են տվել Բրազիլիայի նախագահ Լուիս Ինասիու Լուլա դա Սիլվան, Հնդկաստանի վարչապետ Նարենդրա Մոդին, Հարավաֆրիկյան Հանրապետության նախագահ Սիրիլ Ռամապոսան, ՉԺՀ նախագահ Սի Ծինփինը, Հայաստանի վարչապետ Նիկոլ Փաշինյանը, Թուրքիայի նախագահ Ռեջեփ Թայիփ Էրդողանը, Լաոսի նախագահ Տխոնգլուն Սիսուլիտը և այլք:

Sputnik Արմենիա