Հայ դատն արձագանքել է Հայոց ցեղասպանության պատմության վերանայման մասին Փաշինյանի հայտարարությանը

Հայաստանի վարչապետ Նիկոլ Փաշինյանն իրականացնում է արդեն ոչ թե Հայոց ցեղասպանության միջազգային ճանաչումից հրաժարվելու, այլ Հայոց ցեղասպանության ուրացման քաղաքականություն, հայտարարել է Հայ դատի կենտրոնական գրասենյակը։ Նա այսպես է արձագանքել Փաշինյանի՝ հունվարի 25-ին Շվեյցարիայում արված հայտարարությանը։

Ըստ Հայ դատի՝ Հայոց ցեղասպանության էության նենգափոխումը, կատարված ոճրագործության մասշտաբների մեղմացումը, դրա խնդրի միջազգայնացման դեմ արշավը և տարատեսակ այլ շահարկումները «նախ և առաջ անարգանք են անմեղ զոհերի հիշատակին»։

«Հայաստանի կառավարության ղեկավարի ցնորամիտ ելույթներն անարգանք են նաև Հայոց ցեղասպանությունը տասնամյակներ շարունակ հետազոտող հայ և օտար գիտնականների, Հայոց ցեղասպանության ճանաչման ու դատապարտման համար պայքարած հարյուրավոր մարդասերների, այդ ոճրագործությունն ընդունած տասնյակ պետությունների համար»,- նշել են գրասենյակից։

Ըստ հայտարարության՝ ՀՀ վարչապետը, ով «իր իշխանության երկարաձգման գործում հիմնականում հենվում է տարբեր ուժային կենտրոնների վրա, վերջիններիս աջակցության կորստի մոտալուտ վտանգը զգալով՝ սկսել է դաշնակիցներ փնտրել թշնամական շրջանակներում և ներհայկական խոսույթ ներմուծել այնպիսի գաղափարներ, որոնք տասնամյակներ շարունակ մերժված են քաղաքակիրթ աշխարհի կողմից»։

Նշվում է, որ ՀՀ վարչապետի վարքագիծը կարելի է բնորոշել «ստոկհոլմյան համախտանիշով», երբ զոհն սկսում է համակրանք տածել ագրեսորի նկատմամբ։

«Այս հավանական բացատրությունը չի մեղմացնում Փաշինյանի հանցագործությունը Հայոց պետականության ու պետության նկատմամբ, այլ հավելյալ անգամ ընդգծում է, որ վարչապետի աթոռին նստած՝ Փաշինյանը սխալ տեղում է»,- հավելել են գրասենյակից։

ՀՅԴ-ն ավելացրել է, որ Հայաստանի իշխանությունների կողմից նման հայտարարությունների պայմաններում Հայ դատի հանձնախմբերի ու գրասենյակների միջազգային ցանցը պարբերաբար առերեսվում է հավելյալ խնդիրների, որոնց պայմաններում հայկական շահերի պաշտպանության ուղղությամբ աշխատանքներն էապես դժվարանում են։

«Պետք է նկատել, որ նման հայտարարությունները Հայ դատի ցանցին խանգարում են ավելի շատ, քան ադրբեջանաթուրքական սադրանքները, վարձու լոբբիստներն ու ամենուր տարածվող հակաքարոզչությունը»,- եզրափակել է հանձնախումբը։

Փաշինյանը Շվեյցարիայի հայ համայնքի ներկայացուցիչների հետ հանդիպման ժամանակ հայտարարել էր Հայոց ցեղասպանության պատմությանը «վերադառնալու» անհրաժեշտության մասին։ «Պետք է հասկանանք, թե ի՞նչ է տեղի ունեցել և ինչո՞ւ։ Իսկ ինչպե՞ս ենք դա ընկալել, ո՞ւմ միջոցով։ Ինչպե՞ս եղավ, որ 1939-ին Հայոց ցեղասպանության օրակարգ չկար, բայց 1950-ին հայտնվեց»,- ասել էր նա։

2024 թվականի հոկտեմբերին Հայաստանի արտգործնախարար Արարատ Միրզոյանը հայտարարել էր, որ Հայոց ցեղասպանության միջազգային ճանաչումը չի մտնում Երևանի արտաքին քաղաքականության առաջնահերթությունների մեջ։

Armenia Today