Gallup․ Հայաստանում հարցվածների 60%-ը ճիշտ է համարում մայիսի 9-ին Փաշինյանի Մոսկվա գնալը

Հայաստանում հարցված քաղաքացիների ավելի քան 88 տոկոսը համարում է, որ Հայրենական մեծ պատերազմում տարած հաղթանակի օրը՝ մայիսի 9-ը, կարևոր և տոնական օր է։ Այսօր հրավիրված ասուլիսի ժամանակ այս մասին ասաց Gallup International Association-ի հայաստանյան ներկայացուցչության ղեկավար Արամ Նավասարդյանը։

Հարցվածների 75 տոկոսը նշել է, որ, «այո՛, միանշանակ կարևոր և տոնական օր է», 13,6 տոկոսն ասել է` «ավելի շուտ համարում եմ տոնական օր», 5,9 տոկոսը «ավելի շուտ, ոչ» է պատասխանել հարցին, իսկ 5,2 տոկոսի համար Մայիսի 9-ը միանշանակ կարևոր ու տոնական օր չէ։

Հարցերից մեկը վերաբերել է ՀՀ վարչապետ Նիկոլ Փաշինյանի՝ մայիսի 9-ին Մոսկվայում տոնական շքերթին մասնակցելու որոշմանը։

Հարցվածների մոտ 31 տոկոսը սխալ է գնահատել որոշումը, իսկ 60 տոկոսից ավելին՝ ճիշտ։ Այսպես. 36,7 տոկոսը «միանշանակ ճիշտ է» նշել, 25,4 տոկոսը՝ «ավելի շուտ ճիշտ է», 9,5 տոկոսը «ավելի շուտ սխալ» է գնահատել, իսկ 22,8-ը «միանշանակ սխալ» է համարել։

ՀՀ վարչապետ Նիկոլ Փաշինյանը ՌԴ նախագահ Վլադիմիր Պուտինի հետ հեռախոսազրույցում հաստատել էր իր մասնակցությունը Հայրենական մեծ պատերազմում հաղթանակի 80–ամյակին նվիրված հանդիսավոր միջոցառումներին:

Sputnik Արմենիա