Իմպիչմենտի համար ԱԺ ընդդիմադիր խմբակցություններին 2 ձայն է պակասում

«Հայաստան» խմբակցության 28 ստորագրություն պատրաստ է, ձևաթուղթը խմբակցության գրասենյակում դրված է և երբ սկսվի իմպիչմենտի գործընթաց, այն կփոխանցվի։ Այս մասին այսօր ԱԺ-ում լրագրողների հետ զրույցում հայտարարեց խմբակցության պատգամավոր Իշխան Սաղաթելյանը։

«Ոչ թե պետք է կենտրոնանալ «Հայաստան» խմբակցության վրա ու հարցը այլ ուղղությամբ տանել, այլ ջանքերը պետք է կենտրոնացնել և փորձել համապատասխան քանակի ստորագրություն ունենալ` գործը առաջ տանելու համար»,– ասաց Սաղաթելյանը։

«Պատիվ ունեմ» խմբակցության ղեկավար Հայկ Մամիջանյանն էլ լրագրողներին հայտնեց, որ իմպիչմենտի գործընթաց սկսելու ձևաթղթի տակ խմբակցության 6 պատգամավորի ստորագրությունն արդեն կա։

«Մենք մեր անելիքները բոլոր հարթություններում` թե փողոցային ճնշման, թե տեղեկատվական, թե քաղաքական, շատ հստակ գիտենք ու իրականացնելու ենք և վստահ ենք, որ դրանք հաջողությամբ ենք ավարտելու»,– ասաց Մամիջանյանը։

Նշենք, որ «Հայաստան» և «Պատիվ ունեմ» խմբակցությունների պատգամավորների ստորագրությունները 34-ն են։ Իմպիչմենտի գործընթացը սկսելու համար պակասում է ևս երկու ստորագրություն։

Հիշեցնենք` ընդդիմադիր ակտիվիստ, քաղաքական գործիչ Էդգար Ղազարյանն ու «Վետօ» շարժման անդամ Նարեկ Մալյանը ապրիլի 28-ին 107 նամակներ ուղարկեցին ԱԺ 107 պատգամավորներին՝ առաջարկելով խելամիտ ժամկետում վարչապետի իմպիչմենտ նախաձեռնելու գործընթաց սկսել։

ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը հունիսի 7–ին հաղորդագրություն տարածեց, որ խմբակցությունը որոշել է անվստահություն հայտնել ՀՀ վարչապետ Նիկոլ Փաշինյանին և վարչապետի թեկնածու առաջադրել Մասիս համայնքի ղեկավար Դավիթ Համբարձումյանին։

Ավելի վաղ «Քաղաքացիական պայմանագրից» հեռացված Հովիկ Աղազարյանն ու Հակոբ Ասլանյանը վարչապետի թեկնածու էին առաջադրել «Լուսավոր Հայաստան» կուսակցության նախագահ Էդմոն Մարուքյանին:

Sputnik Արմենիա