Մեծի Տանն Կիլիկիո կաթողիկոսությունը զորակցում է Ամենայն հայոց կաթողիկոսին

Մեծի Տանն Կիլիկիո կաթողիկոսությունը զորակցում է Ամենայն հայոց կաթողիկոսությանը՝ մերժելով նրա դեմ կատարված որևէ ոտնձգություն։ Այդ մասին նշվել է Արամ Ա. կաթողիկոսի նախագահությամբ Անթիլիասի Մայրավանքում կայացած Մեծի Տանն Կիլիկիո կաթողիկոսության Ազգային կենտրոնական վարչության կրոնական ու քաղաքական ժողովների լիակատար նիստի ժամանակ։

Նշվում է, որ ժողովի ժամանակ հատուկ քննարկվել է Հայաստանի իշխանությունների ձեռնարկած հարձակողական վերաբերմունքը Ամենայն հայոց կաթողիկոսի և Սուրբ Էջմիածնի բարձրաստիճան հոգևորականների դեմ։

Այդ առումով ժողովն արձանագրել է, որ պետություն–եկեղեցի հարաբերությունների մասին ՀՀ Սահմանադրության համապատասխան կետերը սահմանել են դրանց անջատ լինելը, հետևաբար, նաև եկեղեցու անկախությունը։

«Եկեղեցուն և եկեղեցականներին վերաբերող հարցերը քննվում են եկեղեցական կանոնադրության համաձայն։ Հետևաբար, եկեղեցուն և եկեղեցականներին առնչվող հարցերին միջամտելու որևէ իրավական հիմք պետությունը չունի: Խստորեն դատապարտելի է եկեղեցական հարցերը հրապարակային քննարկման համար օգտագործած ոճը»,– նշված է հայտարարության մեջ։

Ժողովի մասնակիցները նաև ընդգծել են, որ հայրենիքին դիմագրաված գոյաբանական խնդիրների և անվտանգությանը սպառնացող իրավիճակի դիմաց անհրաժեշտ է նպատակաուղղված աշխատել հայրենիքի գոյությանը սպառնացող վտանգները դիմակայելու ուղղությամբ՝ մերժելով նման բաժանարար և պառակտիչ փորձերը։

Հիշեցնենք, որ ՀՀ վարչապետ Նիկոլ Փաշինյանը մայիսի 29-ին կառավարության նիստի ժամանակ քննադատեց եկեղեցիների վիճակը՝ անվանելով դրանք «չուլանացված և աղբով լի»։ Հունիսի 2–ին նա հայտարարեց` եթե պարզվի, որ Գարեգին Բ–ն իսկապես խախտել է կուսակրոնության ուխտը և զավակ ունի, նա չի կարող լինել Ամենայն հայոց կաթողիկոս։

Հունիսի 9–ին Փաշինյանը հերթական գրառումն արեց` կրկնելով, որ Ամենայն հայոց կաթողիկոսը խախտել է կուսակրոնության ուխտը և զավակ ունի։ Նա «հավատավոր հետևորդներին» կոչ արեց համախմբվել վեհարանն ազատելու և նոր կաթողիկոս ընտրելու օրակարգի շուրջ։ Իսկ հունիսի 10-ին Փաշինյանը հայտարարեց, որ Գարեգին Բ–ին վեհարանից հեռացնելու համար համակարգող խումբ է պետք ստեղծել։

Հունիսի 10-ի լույս 11-ի գիշերը եկեղեցու դեմ սկսված արշավի ֆոնին հարյուրավոր մարդիկ օդանավակայանում «Վեհափառ, վեհափառ» վանկարկումներով դիմավորեցին Արաբական Միացյալ Էմիրություններից վերադարձող Ամենայն հայոց կաթողիկոսին՝ իրենց աջակցությունը հայտնելով նրան ու Հայ առաքելական եկեղեցուն։

Sputnik Արմենիա