Մայիսի 4-5-ին Երևանում ԵՄ-Հայաստան պատմական առաջին գագաթնաժողովը նշանակալի քայլ է հարաբերություններում, որը վերահաստատում է Եվրոպական միության հաստատակամ հանձնառությունը Հայաստանի ինքնիշխանությանը, դիմակայունությանը և բարեփոխումների օրակարգին։ Դրա մասին ասվում է Հայաստանում Եվրոպական միության պատվիրակության հրապարակման մեջ։
Գագաթնաժողովին կմասնակցեն Եվրահանձնաժողովի ղեկավարներ Ուրսուլա ֆոն դեր Լայենը և Անտոնիո Կոստան, որոնք ներկայացնում են Եվրոպական միությունը, ինչպես նաև վարչապետ Նիկոլ Փաշինյանը՝ ներկայացնելով Հայաստանը։ Գագաթնաժողովին կմասնակցի նաև ԵՄ Բարձր ներկայացուցիչ Կայա Կալասը։
Գագաթնաժողովում առաջնորդները կամփոփեն երկկողմ հարաբերություններում վերջին առաջընթացը և կամրապնդեն համագործակցությունը, հատկապես տնտեսության, տրանսպորտային ենթակառուցվածքների և անվտանգության ոլորտներում։ Նրանք նաև կքննարկեն Հարավային Կովկասում կայունության և կայուն աճի բարձրացմանն ուղղված համատեղ ջանքերը։ Օրակարգում կներառվեն նաև տարածաշրջանային և գլոբալ իրադարձությունները, ներառյալ՝ Ուկրաինայում և Մերձավոր Արևելքում։
Գագաթնաժողովի հիմնական արդյունքները կներառեն ԵՄ-Հայաստան գործընկերության մեկնարկը տրանսպորտային ենթակառուցվածքների ոլորտում, որն ընդգրկում է համագործակցությունը տրանսպորտի, էներգետիկայի, թվային տեխնոլոգիաների, ինչպես նաև մարդկային շփումների ոլորտներում՝ տրանսպորտային ենթակառուցվածքների և տրանսպորտի հարցերով բարձր մակարդակի հատուկ երկխոսությունների անցկացմամբ։ Սա կլրացվի Հայաստանում ԵՄ մասնավոր ներդրումների մոբիլիզացման նախաձեռնություններով։
Կողմերը կոնկրետ քայլեր կձեռնարկեն անվտանգության և պաշտպանության ոլորտում համագործակցության խորացման ուղղությամբ, մասնավորապես՝ Հայաստանում ԵՄ նոր գործընկերային առաքելության ստեղծման միջոցով։
Ավարտին ղեկավարները ներկա կլինեն Եվրոպական սահմանային և առափնյա պահպանության գործակալության («Frontex») և Հայաստանի ներքին գործերի նախարարության միջև աշխատանքային համաձայնագրի ստորագրմանը։
ԵՄ-Հայաստան պատմության մեջ առաջին գագաթնաժողովը ցուցադրում է ԵՄ-ի և Հայաստանի միջև համագործակցության շոշափելի առավելությունները, ինչպես նաև Հարավային Կովկասում խաղաղության և բարօրության խթանման գործում ԵՄ հանձնառությունը։
News.am
