Ամերիկացի մի խումբ սենատորներ Բայդենին կոչ են արել հետաձգել Թուրքիային F-16 կործանիչների վաճառքը
ՆԱՏՕ-ի Սենատի մոնիտորինգի խմբի համանախագահներ, ԱՄՆ սենատորներ Ջին Շահինը և Թոմ Թիլիսն այսօր երկկուսակցական նամակ են հղել ԱՄՆ նախագահ Ջո Բայդենին՝ մտահոգություն հայտնելով ՆԱՏՕ-ին անդամակցելու Շվեդիայի և Ֆինլանդիայի հայտերի վավերացման Թուրքիայի շարունակական ձգձգումների կապակցությամբ: Այս մասին հաղորդվում է սենատոր Ջին Շահինի կայքում։
Նամակում նշվում է, որ Կոնգրեսի կողմից Թուրքիային F-16 կործանիչների վաճառքի քննարկումը չպետք է սկսվի այնքան ժամանակ, քանի դեռ չեն վավերացվել ՆԱՏՕ-ի արձանագրությունները։
«Մենք մտահոգությամբ գրում ենք նախագահ Էրդողանի և Թուրքիայի Հանրապետության կողմից Հյուսիսատլանտյան դաշինքին (ՆԱՏՕ) Շվեդիայի և Ֆինլանդիայի միանալու արձանագրությունների վավերացման շարունակական ձգձգումների կապակցությամբ: Արձանագրությունները չվավերացնելը կամ վավերացման համար ժամկետ չներկայացնելը սպառնում է Հյուսիսատլանտյան դաշինքի միասնությանը պատմության բեկումնային պահին, քանի որ Ռուսաստանը շարունակում է իր չհրահրված ներխուժումը Ուկրաինա: Թուրքիայի հետ արդյունավետ և փոխշահավետ երկկողմ անվտանգության հարաբերությունները բխում են Միացյալ Նահանգների շահերից, և մենք ա սպասում ենք կառավարության կողմից ՆԱՏՕ-ին Շվեդիայի և Ֆինլանդիայի միանալու արձանագրությունների վավերացմանը»,- գրել են սենատորները։
«Այնուամենայնիվ պետք է հաշվի առնել Թուրքիայի, Ֆինլանդիայի և Շվեդիայի միջև եռակողմ փոխըմբռնման հուշագրով նախատեսված իր պարտավորությունները չկատարելը, քանի որ Կոնգրեսը չի կարող դիտարկել Թուրքիային ապագա աջակցությունը, ներառյալ F-16 կործանիչների վաճառքը, մինչև Թուրքիան չավարտի անդամակցության արձանագրությունների վավերացումը»,- գրել են սենատորները Բայդենին ուղղված նամակում։
News.am
