Վարդաշենցիները բողոքի ակցիան շարունակում են կառավարության դիմաց. պահանջը նույնն է (ՏԵՍԱՆՅՈՒԹ)

Վարդաշեն թաղամասի հանրակացարանների 2 վթարային շենքերի բնակիչներն իրենց բողոքի ակցիան շարունակում են կառավարության շենքի մոտ։

Նշենք, որ Վարդաշեն թաղամասի հանրակացարանային շենքերը 4-րդ կարգի վթարային են, կոյուղու խողովակներն էլ վնասված են, կեղտաջրերը լցվում են շենքի նկուղ և առաջին հարկեր։ Քանի որ խնդիրը տևական ժամանակ է` լուծում չի ստանում, ինչպես նախորդ շաբաթ, այդպես էլ այսօր, վարդաշենցիները վաղ առավոտից բողոքի ակցիա էին իրականացնում Երևանի քաղաքապետարանի դիմաց։ Ակցիայից մի քանի ժամ անց 2 շենքից 3-ական անձ հանդիպման գնացին Անշարժ գույքի կառավարման վարչության պետ Վահան Խաչատրյանի հետ, չնայած, որ սկզբում պահանջում էին հանդիպում քաղաքապետ Տիգրան Ավինյանի կամ փոխքաղաքապետ Արմեն Փամբուխչյանի հետ։

«Մեզ հանդիպման ժամանակ ասել են` պետք է համբերենք։ Ասացի, որ գնում ենք կառավարություն ու այնտեղ էլ մեր բողոքի ձայնը բարձրացնենք։ Ասացին, որ առաջիկա 2 ամսում մեզ պատասխան կտան, թե ինչ են որոշել ու ինչ են անելու»,– ասաց բնակիչներից մեկը։

Արդեն կառավարության դիմաց բնակիչները հայտնեցին, որ պահանջում են հանդիպում վարչապետի աշխատակազմի ղեկավար Արայիկ Հարությունյանի հետ։

Վարդաշենցիներն ընդգծեցին, որ իրենք պարտադիր պահանջում են հստակ ժամկետներ նշել ու իրենց հարցերին տալ գրավոր պատասխան, որպեսզի ամեն ինչ իրավական հիմք ունենա։

Ոստիկաններն այժմ քննարկումներ են իրականացնում կառավարությունում` հասկանալու, թե ով է պատրաստ հանդիպել բողոքի ակցիա իրականացնող քաղաքացիների հետ։

Sputnik Արմենիա