Բաքվում Եվրոպական միության (ԵՄ) դեսպան Մարիանա Կույունջիչը կանչվել է Ադրբեջանի ԱԳՆ, նրան բողոքի նոտա է հանձնվել ապրիլի 30-ին Եվրոպական խորհրդարանի ընդունած հակաադրբեջանական բանաձևի կապակցությամբ, հայտնել է հանրապետության արտաքին քաղաքական գերատեսչությունը։
«Ադրբեջանական կողմը հանդիպման ընթացքում վճռականորեն դատապարտել է մեր երկրի վերաբերյալ անհիմն և կողմնակալ դրույթները, որոնք պարունակվում են Եվրոպական խորհրդարանի ապրիլի 30-ի բանաձևում։ Այս կապակցությամբ դեսպանին հանձնվել է բողոքի նոտա»,- նշվել է հաղորդագրության մեջ։
Նշվել է, որ բանաձևի դրույթները խեղաթյուրում են իրականությունը, հակասում են օբյեկտիվության սկզբունքներին, ինչպես նաև պետությունների ինքնիշխանության և տարածքային ամբողջականության նկատմամբ հարգանքի պարտավորություններին։
«Հանդիպման ընթացքում ընդգծվել է, որ Եվրոպական խորհրդարանի նման մոտեցումը բացասաբար է ազդում տարածաշրջանում կարգավորման գործընթացի, ինչպես նաև Ադրբեջանի և Եվրոպական միության միջև հարաբերությունների հեռանկարների վրա»,- հայտնել են գերատեսչությունում։
ԱԳՆ-ում հավելել են, որ բանաձևում առկա պնդումները Ղարաբաղի տարածաշրջան հայ բնակիչների վերադարձի մասին բացարձակապես անհիմն են, իսկ նման կոչերը կրում են Ադրբեջանի ներքին գործերին միջամտելու բնույթ։
«ԵՄ դեսպանին տեղեկացվել է, որ, չնայած 2023 թվականին Ադրբեջանի Սահմանադրությանը համապատասխան ներկայացված վերաինտեգրման ծրագրին, հայ բնակիչները տարածաշրջանը լքել են կամավոր հիմունքներով։ Հակառակը պնդող հայտարարությունները կեղծ են»,- նշվել է տեղեկատվության մեջ։
Բացի այդ, հանդիպման ընթացքում նշվել է, որ հայկական ծագում ունեցող անձանց ազատ արձակելու կոչերը, որոնք ներկայացվում են որպես «ռազմագերիներ», իրավաբանորեն անընդունելի են։
Գերատեսչությունում դիվանագետին հիշեցրել են, որ Ադրբեջանը, առաջնորդվելով մարդասիրական սկզբունքներով, ազատ է արձակել կալանավորվածների մեծամասնությանը և քայլեր է ձեռնարկել Հայաստանի հետ վստահության ամրապնդման ուղղությամբ։ Միևնույն ժամանակ, այն անձինք, որոնց նկատմամբ կայացվել են դատավճիռներ, մեղադրվում են ծանր հանցագործություններ կատարելու մեջ, այդ թվում՝ ահաբեկչության, դիվերսիաների և ռազմական հանցագործությունների։
ԱԳՆ-ն նաև անընդունելի և անհիմն է համարում «հայերի մշակութային և կրոնական ժառանգության ոչնչացման» մասին պնդումները։ Միաժամանակ, գերատեսչությունը ուշադրություն է հրավիրում այն հանգամանքի վրա, որ Ադրբեջանի մշակութային և կրոնական ժառանգության լայնածավալ ոչնչացման և պղծման փաստերը՝ Հայաստանի կողմից ադրբեջանական տարածքների օկուպացիայի ժամանակահատվածում, եվրոպական ինստիտուտների կողմից պատշաճ գնահատականի չեն արժանացել։
Արտաքին քաղաքական գերատեսչությունում ԵՄ ներկայացուցչին կոչ են արել կանխել նման քայլերը, որոնք վնաս են հասցնում ադրբեջանա-եվրոպական հարաբերություններին, ինչպես նաև տարածաշրջանում խաղաղության և կարգավորման գործընթացին։
News.am
