Արսեն Բաբայան. Վարչական վերահսկողությամբ փորձում են սահմանափակել անձանց քաղաքական իրավունքը

Քննչական մարմինը վարչական վերահսկողության միջոցով փորձում է սահմանափակել «Մեր քաղաքը» դաշինքի անդամների, շտաբի ներկայացուցիչների քաղաքական իրավունքները։ Հակակոռուպցիոն դատարանի դիմաց լրագրողների հետ զրույցում հայտարարեց փաստաբան Արսեն Բաբայանը։

«Քննչական մարմինը վարչական վերահսկողության ներքո պահանջում է, որ ընդհանրապես չշփվեն նախընտրական քարոզարշավի հետ կապ ունեցող մարդկանց հետ, թեկնածուների հետ, չայցելեն շտաբներ։ Մենք երկու անձի դեպքում գործ ունենք ավագանու թեկնածուների հետ, երբ նրանց նկատմամբ նման պահանջներ է դրվում, նշանակում է, որ նրանք չեն կարող մասնակցել ընտրությանը, քարոզարշավի վերջին օրն է, պահեցին մարդկանց ձերբակալված, այսօր էլ կփորձեն կիրառել վարչական վերահսկողություն, որ այդ մարդիկ չմասնակցեն կազմակերպչական աշխատանքներին։ Ձերբակալվածների թվում կան նաև նախընտրական շտաբի անդամներ»,-ասաց Արսեն Բաբայանը։

Նա ընդգծեց, որ ձերբակալվածներին ապօրինի կերպով են պահում անազատության մեջ, քանի որ երեկ երեկոյան, երբ Հակակոռուպցիոն կոմիտեն տարածեց հայտարարություն, որ այդ անձանց նկատմամաբ պետք է կիրառվի վարչական վերահսկողություն, նրանք պետք է ազատ արձակվեին։

«Այդ պահից սկսած մինչև այս պահը նրանք ապօրինի ձերբակալված են, ձերբակալման այն հիմքը որ դրել էին՝ 111 հոդվածը, վերաբերում է կալանքի համար անձանց դատարան ներկայացնելուն, իսկ եթե դուք գիտես, որ անձանց կալանքի չես տանելու, չես կարող այլևս նրանց ձերբակալված պահել»,-ընդգծեց Բաբայանը։

Panorama.am