Սամվել Կարապետյանի դեմ քրվարույթ է հարուցվել ԶԼՄ-ների երկու նյութի հիման վրա

Գլխավոր դատախազ Աննա Վարդապետյանը Քննչական կոմիտեին հանցագործության մասին երկու հաղորդում է ներկայացրել, որի հիման վրա էլ վարույթ է հարուցվել «Տաշիր» ընկերությունների խմբի նախագահ, բարերար Սամվել Կարապետյանի դեմ, «Ազատությանը» հայտնել են Գլխավոր դատախազությունից։

Նշվում է, որ վարույթը հարուցվել է գլխավոր դատախազի կողմից Քննչական կոմիտեի նախագահին ուղարկված ԶԼՄ-ներում հրապարակված նյութերի հիման վրա։

Մասնավորապես՝ քրվարույթի հիմք են հանդիսացել 168.am կայքի՝ «Եթե քաղաքական գործիչներին չհաջողվի, մեր ձևով ենք միջամտելու եկեղեցու դեմ արշավին. Սամվել Կարապետյան» վերտառությամբ և Aravot.daily կայքի՝ «Սամվել Կարապետյանի դեմ Նիկոլ Փաշինյանի սպառնալիքներից հետո իրավապահները գործի անցան» վերնագրերով հրապարակումները։

Կարապետյանի փաստաբան Արամ Վարդևանյանն այսօր հրավիրած ասուլիսում տեղեկացրել էր, որ Գլխավոր դատախազն անձամբ է հանցագործության մասին հաղորդում ներկայացրել Քննչական կոմիտե՝ Կարապետյանի հարցազրույցի առնչությամբ:

«Ապօրինի քրեական այս հետապնդումն սկիզբ է առել Գլխավոր դատախազի կողմից ներկայացված հաղորդման հիման վրա: Ես նման դեպք չեմ հիշում, որ Գլխավոր դատախազը հենց ինքը մամուլի ուսումնասիրման վրա հաղորդում ներկայացնի: Ոչ թե հետապնդում հարուցի, այլ հենց հաղորդում ներկայացնի Քննչական կոմիտեին»,- նշել էր Վարդևանյանը:

Իրավապահները խուզարկություններ էին իրականացրել «Տաշիր գրուպի» երևանյան գլխավոր գրասենյակում: Ըստ ՔԿ-ի՝ գործողություններն իրականացվել էին «առանձնապես խոշոր չափերով փողերի լվացման և առանձնապես խոշոր չափերով հարկերը, տուրքերը կամ այլ վճարներ չվճարելու հատկանիշներով նախաձեռնված քրեական վարույթի շրջանակներում»։

Հունիսի 19-ին դատարանը երկու ամսով կալանավորել էր Կարապետյանին իշխանությունը զավթելու կոչեր անելու մեղադրանքով, երբ նա քննադատել էր Ամենայն Հայոց կաթողիկոսի և հոգևորականների դեմ Հայաստանի իշխանությունների արշավը: Գործարարը չի ընդունում մեղադրանքը և մտադիր է բողոքարկել այն եվրոպական դատարանում:

Կարապետյանի ընտանիքը հունիսի 30-ին ՀՀ պետական մարմիններին պաշտոնապես ծանուցել էր ներդրումային վեճ սկսելու մասին:

Armenia Today