Վարչապետը մտածելու շատ բան ունի

Հայաստանի վարչապետ Նիկոլ Փաշինյանը Facebook–ի իր էջում հայտնեց, որ ELARD–ի հետ առցանց ասուլիսը կայացել է։

Օգոստոսի 23-ին Փաշինյանը ջերմուկցիների հետ հանդիպման ընթացքում ասել է, որ Skype–ով առցանց ասուլիս կանցկացնի Earth link & Advanced Resources Development (ELARD) ընկերության ներկայացուցիչների հետ Ամուլսարի հարցով, որի ժամանակ, նրա խոսքով, կբարձրացվեն հասարակայնությանը հուզող բոլոր հարցերը։

««Էլարդի» հետ Skype-կոնֆերանսը տեղի ունեցավ: Քանի որ նկարահանվել է մի քանի տեսախցիկից, նյութի մոնտաժումը կտևի մի քանի ժամ:

Ինչպես և պայմանավորվել էինք, խոսակցությունն ամբողջությամբ կհրապարակվի: Մտածելու շատ բան կա: Նյութը կնայեք, կխոսենք»,– գրել է վարչապետը։

Ամուլսարի հանքավայրի աշխատանքը, որի շահագործմամբ զբաղվում է Lydian Armenia ընկերությունը, արդեն կես տարուց ավելի է, ինչ դադարեցված է` Ջերմուկում և Սևանում շրջակա միջավայրի վրա ազդեցության փորձագիտական գնահատական ստանալու նպատակով։

Օգոստոսի 15–ին Հայաստանի քննչական կոմիտեի ղեկավար Հայկ Գրիգորյանը ներկայացրել է միջազգային փորձագիտական խմբի եզրակացությունը, որի համաձայն, բնապահպանական սպառնալիքներ չկան, իսկ հավանականները հնարավոր է վերահսկել քայլերի ձեռնարկմամբ։

Փորձաքննությունն անցկացվել է Earth link & Advanced Resources Development (ELARD) ընկերությունը Քննչական կոմիտեում 2018 թվականի հուլիսի 20–ին հարուցված քրեական գործի շրջանակում։ Փորձաքննության նպատակն Ամուլսարի հանքավայրի շահագործման բնապահպանական և սոցիալական ազդեցության գնահատումն է։