Երևանի ընդհանուր իրավասության քրեական դատարանի նախագահ է նշանակվել դատավոր Մնացական Մարտիրոսյանը։ ՀՀ նախագահ Վահագն Խաչատուրյանը համապատասխան հրամանագիր է ստորագրել, որը հրապարակված է նախագահի պաշտոնական կայքէջի «փաստաթղթեր» բաժնում։

Ֆինլանդիան շարունակում է հավատարիմ մնալ ՆԱՏՕ-ին անդամակցելու իր ծրագրին՝ Շվեդիայի հետ միաժամանակ, երկուշաբթի հայտարարել է Ֆինլանդիայի արտաքին գործերի նախարար Պեկկա Հաավիստոն, հայտնում է Reuters-ը։

Միացյալ Թագավորության «Start» հիմնադրամը Լաչինի միջանցքի փակման պատճառով տուժած անձանց համար որպես աջակցություն կհատկացնի 350,000 ֆունտ սթեռլինգ։ Այս մասին հայտարարել է Միացյալ Թագավորության ԱԳ նախարարի խոսնակ Դեյվիդ Ռաթլին, հայտնում է Միացյալ Թագավորության Հայ դատի հանձնախումբը Ֆեյսբուքի էջում։

Տավուշի նախկին մարզպետ Հովիկ Աբովյանից ապօրինի ծագում ունեցող անշարժ ու շարժական գույքի, խոշոր չափերի գումարի բռնագանձման պահանջ է ներկայացվել։ Տեղեկությունը հայտնում է ՀՀ գլխավոր դատախազության մամուլի ծառայությունը։

Իրանի խորհրդարանի նախագահ Մոհամմադ Բաղեր Ղալիբաֆը Ադրբեջանի իշխանություններին նախազգուշացրել է, որ էմոցիոնալ որոշումներ չընդունեն դեսպանատան վրա հարձակման հետ կապված, հայտնում է Mehr-ը։

Ադրբեջանի նախագահ Իլհամ Ալիևը և Հունգարիայի վարչապետ Վիկտոր Օրբանը Ադրբեջանի և Հունգարիայի միջև ընդլայնված ռազմավարական գործընկերության մասին հռչակագիր են ստորագրել։

Հայկական կողմին փոխանցված զինծառայողի մարմինը նույնականացնելու համար դատաբժշկական և դատագենետիկական փորձաքննություններ են նշանակվել։ Sputnik Արմենիայի հետ զրույցում տեղեկությունը հայտնեց ՀՀ քննչական կոմիտեի մամուլի խոսնակ Գոռ Աբրահամյանը։

ՌԴ խաղաղապահները երեկ` հունվարի 29-ին, Լեռնային Ղարաբաղից Հայաստան են տեղափոխել Ռուսաստանի Դաշնության 44 քաղաքացու։

Հետաքննության նախնական տվյալները ցույց են տալիս, որ Իսրայելը առնչություն ունի իրանական Սպահանում գտնվող ռազմական գործարանի վրա անօդաչուների հարձակմանը։ Այս մասին երկուշաբթի հայտնել է Al Jazeera հեռուստաալիքը՝ վկայակոչելով Իրանի բարձրաստիճան պաշտոնյային։