Իրանի և ԱՄՆ-ի միջև ուղիղ բանակցությունների հաջորդ փուլը տեղի կունենա «մոտ ժամանակներս», դիվանագիտական ջանքերը դրական արդյունքներ են տալիս: «Արմենպրես»-ի փոխանցմամբ՝ այս մասին հայտարարել է Պակիստանի պաշտպանության նախարար Խավաջա Ասիֆը։
«Դիտվում է միայն դրական առաջընթաց», – մեջբերել է նրա խոսքը The Express Tribune թերթը։
Ասիֆի խոսքով՝ շարունակվող դիվանագիտական ջանքերը շարժվում են «կառուցողական ուղղությամբ»։
Իր հերթին, The Associated Press գործակալությունը, վկայակոչելով աղբյուրների, հայտնել է, որ Վաշինգտոնը և Թեհրանը քննարկում են Իսլամաբադում կրկին հանդիպում անցկացնելու հնարավորությունը. ուղիղ բանակցությունների նոր փուլը կարող է տեղի ունենալ ապրիլի 16-ին։ Միևնույն ժամանակ ԱՄՆ վարչակազմի պաշտոնատար անձինք նշում են Ժնևը որպես բանակցությունների նոր փուլի անցկացման հնարավոր վայր։
Ապրիլի 11-ին Իրանը և ԱՄՆ-ն Իսլամաբադում անցկացրել են մի քանի փուլ բանակցություններ։ Իրանի պատվիրակությունը գլխավորել է խորհրդարանի խոսնակ Մոհամմադ Բաղեր Ղալիբաֆը, իսկ ամերիկյան պատվիրակությունը՝ փոխնախագահ Ջեյ Դի Վենսը։ Կողմերին չի հաջողվել համաձայնության գալ հակամարտության երկարաժամկետ կարգավորման հարցի շուրջ՝ մի շարք հակասությունների պատճառով: Միացյալ Նահանգները հայտարարել է ապրիլի 13-ից Իրանի նկատմամբ ծովային շրջափակում սահմանելու մասին:
