Իշխող «Քաղաքացիական պայմանագիր» կուսակցության մեջ էլ լինում են անձինք, որոնք իրավունքի հետ կապված խնդիրներ են ունենում, բա դրա վերաբերյալ ինչի՞ մի ձայնագրություն չի լինում։ Այս մասին ապրիլի 22-ին լրագրողների հետ զրույցում հայտարարել է «Ուժեղ Հայաստան» կուսակցությունների դաշինքի ներկայացուցիչ Արամ Վարդևանյանը։ Վարդևանյանը լրագրողների հետ հանդիպել է Կենտրոնական ընտրական հանձնաժողովի շենքի մոտ՝ հունիսի 7-ին նշանակված խորհրդարանական ընտրություններին մասնակցելու համար անհրաժեշտ բոլոր փաստաթղթերը, այդ թվում՝ պատգամավորության թեկնածուների համամասնական ցուցակը ԿԸՀ ներկայացնելուց հետո։
«Հակակոռուպցիոն կոմիտեն ինչո՞ւ ՔՊ-ի որևէ անդամի վերաբերյալ մի ձայնագրություն չի հրապարակում», – հարց է տվել Վարդևանյանը։
Քաղաքական գործչի համոզմամբ՝ ընդդիմադիր ուժերի գաղտնալսման վրա նման աստիճանի կենտրոնացումը կարելի է որոշակիորեն համարել թուլության նշան։
Նա նաև նշել է, որ հրապարակված ձայնագրությունները մոնտաժված են, և դրանց բովանդակությանը պետք է վերաբերվել մեծ վերապահումով։
News.am
