ՀՀ ԱԺ նախագահ Ալեն Սիմոնյանը ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի ծննդյան օրը` ապրիլի 7–ին, հեռախոսային զրույցի ընթացքում քաղաքական հարցեր չի քննարկել։ Նա այդ մասին ասաց լրագրողների հետ ճեպազրույցում։
«Իմ գործընկերոջ ծննդյան կապակցությամբ է զանգը եղել, և պետք է ասեմ, որ ամենալավ և հարգալից հարաբերություններն ունեմ Դաշնության խորհրդի ղեկավարի հետ։ Մենք խոսում ենք բաց, ուղիղ, երկուստեք հարգանքի տրամաբանության մեջ։ Այս անգամ հիմնական խոսակցությունը եղել է անձնական բնույթի, ծննդյան կապակցությամբ»,–ասաց Սիմոնյանը։
Նա հիշեցրեց, որ ապրիլի 16-19-ը կլինի Ստամբուլում` մասնակցելու Միջխորհրդարանական միության 152-րդ վեհաժողովին, որի շրջանակում Մատվիենկոյի հետ շփվելու հնարավորություն կունենա։
«Մատվիենկոն նույնպես այնտեղ լինելու է։ Ենթադրում եմ, որ այնտեղ կշփվենք»,–ասաց Սիմոնյանը։
Նա ընդգծեց, որ վեհաժողովի շրջանակում հանդիպումներ են նախատեսված Ադրբեջանի և Վրաստանի գործընկերների հետ։
Sputnik Արմենիա
