«Ուժեղ Հայաստան» կուսակցության անդամ Գոհար Ղումաշյանը ձերբակալվել է։ Լրագրողների հետ զրույցում այս մասին ասաց փաստաբան Արամ Վարդևանյանը, որը ստանձնել է գործընկերոջ իրավական պաշտպանությունը։
Նրա ձերբակալությանն արձագանքել է «Ուժեղ Հայաստան» կուսակցության առաջնորդ Սամվել Կարապետյանը։ Ֆեյսբուքյան պաշտոնական էջում հրապարակված գրառման մեջ Կարապետյանը սա անվանել է «Փաշինյանի խուճապի հերթական դրսևորումը»։
«Սամվել Կարապետյանից վախեցած Փաշինյանը իրավապահներ է ուղարկել՝ բերման ենթարկելու կրծքով կերակրող, բազմազավակ մորը` «Ուժեղ Հայաստան» կուսակցության անդամ Գոհար Ղումաշյանին»,- գրել է Կարապետյանը։
Հիշեցնենք` քիչ առաջ հայտնի դարձավ, որ Ղումաշյանին բերման են ենթարկել բարեգործության արգելքի խախտման կասկածանքով։
Ըստ տեղեկությունների՝ Գոհար Ղումաշյանի ձերբակալությունը կապ ունի փետրվարին ֆեյսբուքյան իր էջում հրապարակված տեսաուղերձի հետ, որում Ղումաշյանը նշում է, թե «Սարգիս Կարապետյան» հիմնադրամի հայտարարած «Հայաստանի 100 լավագույն ուսանող» խորագրով մրցույթն ամփոփվել է, սակայն 2026թ․ փետրվարի 6-ին ՀՀ նախագահը ստորագրել է ԱԺ հերթական ընտրություններ անցկացնելու հրամանագիրը։ Ըստ այդմ՝ ուժի մեջ են մտել այնպիսի կարգավորումներ, որոնք թույլ չեն տալիս հիմնադրամին իրականացնել մրցույթի ամփոփումը մինչև ընտրությունների ավարտը։ Ղումաշյանը նշել է, թե հրամանագիրը մեկ ամիս շուտ է ստորագրվել սպասվող ժամանակից։ Դիմելով ուսանողներին` նա վստահեցրել է, որ ընտրություններից հետո, անկախ դրանց արդյունքներից, կհասցնեն ավարտին հասցնել իրենց ծրագիրը, և ուսանողները կստանան իրենց արժանի պարգևները։
Sputnik Արմենիա
