«Միասնության թևեր» քաղաքական նախաձեռնության առաջնորդ Արման Թաթոյանը խորհրդակցություններ է սկսել հանրային տարբեր գործիչների հետ՝ նպատակ ունենալով ձևավորել հասարակական բարձր հեղինակություն վայելող թեկնածուների նախընտրական ցուցակ, հայտնել է «Հրապարակ» օրաթերթը։
Պարբերականը նշել է, որ Թաթոյանը, որը հանդես է գալիս որպես այլընտրանքային քաղաքական գործիչ՝ զերծ մնալով ներկա և նախկին իշխանությունների հետ փոխկապակցվածությունից, ձգտում է կազմել այնպիսի ցուցակ, որի անդամների կենսագրությունն ու գործունեությունը լինեն անբասիր։
Թերթի փոխանցմամբ՝ հավանական թեկնածուների թվում դիտարկվել է լրագրող Ալիսա Գևորգյանը՝ որպես ցուցակի առաջին կին թեկնածու։ Բացի այդ, ըստ պարբերականի, քննարկումներ են ընթանում հասարակական-քաղաքական գործիչ, ԵՊՀ ամբիոնի վարիչ Անուշ Սեդրակյանի հետ։
Թաթոյանը քաղաքականություն մտնելու մասին հայտնել էր 2025 թվականի հոկտեմբերի 6-ին, հոկտեմբերի 9-ին պաշտոնապես մեկնարկել էր «Միասնության թևեր» անվամբ քաղաքական նախաձեռնությունը։ Փետրվարին նախաձեռնության և «ՀայաՔվե» ազգային քաղաքացիական միավորման միջև առաջիկա համապետական ընտրություններում միասնական ճակատով հանդես գալու նպատակով ստորագրվել էր համագործակցության հուշագիր, սակայն ապրիլին այն չեղարկվել էր։
Armenia Today
