Այսօր Հայ առաքելական եկեղեցին ներսից վիրավորված է, դրսից՝ ճնշումների տակ, հանրային անվստահությունը մեծ է, պետությունն էլ միայն մեղադրում է։ Հայոց առաջին լուսավորիչներ սուրբ Թադեոս և սուրբ Բարդուղիմեոս առաքյալների տոնին Մայր տաճարում սուրբ պատարագի ժամանակ այս հայտարարությունն արեց Դանիել եպիսկոպոս Ֆնդկյանը։
Իր քարոզում եպիսկոպոսը նկարագրեց Հայաստանի իշխանությունների հարձակումների ֆոնին Հայ առաքելական եկեղեցու շուրջ ստեղծված իրավիճակը։
«Այսօր մենք հավաքվել ենք խորը խառնաշփոթի և ցավի մի իրավիճակում։ Եկեղեցին ներսից վիրավորված է, դրսից՝ ճնշումների տակ։ Հանրային անվստահությունը մեծ է, պետությունը մեղադրում է, եկեղեցին` պաշտպանվում, կասկած է լցվել մթնոլորտ։ Մեր սիրելի ժողովուրդը գտնվում է դատողությունների և կասկածների փոթորկի մեջ, որոնք փչում են ամեն կողմից։ Նման իրավիճակում խիստ մեծ գայթակղություն կա, որ ժողովուրդը փշրվելով կվերածվի հպարտ կուսակցությունների։ Այդպիսի ժողովուրդը քաղաքական օրակարգերը վեր կդասի Ավետարանից և եկեղեցու գործունեությունից», – ասաց հոգևորականը։
Նա ընդգծեց, որ եկեղեցին չպետք է ենթարկվի ներքին պառակտման։ Եպիսկոպոսը հիշեցրեց Պողոս առաքյալի խոսքերը, որ եկեղեցին Քրիստոսի մարմինն է, և եթե մեկը տառապում է, բոլորը տառապում են։ Նա շեշտեց, որ դարերի ընթացքում հենց այսպիսի մտածողությամբ է հայ ժողովուրդը հաղթահարել ծանր փորձությունները և հալածանքները, ոչ մի կայսրություն չի կարողացել կոտրել հայերի հավատքն ու հույսը։
«Պիտի մերժենք բաժանման թույնը։ Չպիտի թողենք, որ քաղաքական խոսքերը որոշեն մեր հարաբերությունները, միմյանց պիտի վերաբերվենք ոչ թե որպես հակառակորդ, այլ որպես մեկ մարդու մարմնի անդամներ, որպես Քրիստոսի հարազատ քույրեր և եղբայրներ։ Պիտի հիմնվենք Ավետարանի վրա, եկեղեցին պիտի նորոգվի, քաջ լինի, ժողովուրդը՝ խոնարհ, աղոթող, հաստատուն։ Բոլորս միասին պիտի վկայենք իշխանությանը, որ Քրիստոսն է մեր խաղաղությունը, մեր լույսը, մեր միասնականությունը, մեր փրկությունը։ Մեր Առաքելական եկեղեցին պարզապես հիացմունքի առարկա չէ, այլ կոչված է վերակենդանացվելու։ Այն չպիտի վերածենք թանգարանի ու փառամոլ անցյալի հուշարձանի, պիտի նորոգենք ր կյանք ու սեր հաղորդենք նրան, որպեսզի աստծու սուրբ հոգին կյանք հաղորդի նաև մեզ»,– նշեց եպիսկոպոսը։
Sputnik Արմենիա
