Իրանը, Ռուսաստանը և Ադրբեջանը Բաքվում ստորագրել են նոր եռակողմ համաձայնագիր՝ Հյուսիս-Հարավ միջազգային տրանսպորտային միջանցքի արևմտյան երթուղին ընդլայնելու վերաբերյալ, հաղորդում է Mehr-ը։
ԱՊՀ գագաթնաժողովի շրջանակներում Իրանի, Ռուսաստանի և Ադրբեջանի երկաթուղիների ղեկավարները ստորագրել են փոխըմբռնման հուշագիր՝ ուղղված երկարաժամկետ և փոխշահավետ համագործակցության ամրապնդմանը։
Ինչպես հայտնում է Mehr լրատվական գործակալությունը, Բաքվում տեղի է ունեցել Անկախ Պետությունների Համագործակցության (ԱՊՀ) Տրանսպորտային խորհրդի 83-րդ նիստը՝ անդամ-պետությունների 15 ղեկավարների և պատվիրակությունների մասնակցությամբ։
Այս հուշագիրն ընդգրկում է այնպիսի ոլորտներ, ինչպիսիք են Հյուսիս–Հարավ Միջազգային տրանսպորտային միջանցքի արևմտյան երթուղով բեռների փոխադրման համար ֆիքսված գների սահմանումը, մրցունակ միասնական սակագների որոշումը և լոգիստիկ ծառայությունների ընդլայնումը։
«Համաձայն այս հուշագրի, երեք երկրները հաստատել են իրենց հանձնառությունը կայուն և փոխշահավետ երկկողմ և բազմակողմ համագործակցությանը և իրենց առջև նպատակ են դրել Հյուսիս–Հարավ միջանցքի արևմտյան երթուղին վերածել ակտիվ տարածաշրջանային տարանցիկ երթուղու», – գրում է իրանական ԶԼՄ-ն։
News.am
