16 տարին լրացած անձանց համար նույնականացման քարտ ունենալը կդառնա պարտադիր։ ՀՀ կառավարության նիստի ժամանակ այս մասին տեղեկացրեց ներքին գործերի նախարար Արփինե Սարգսյանը` ներկայացնելով «Անձը հաստատող փաստաթղթի մասին» օրենքի և հարակից օրենքների նախագծերի փաթեթը։
«Միայն նույնականացման քարտ ունենալու պարագայում անձը կկարողանա ունենալ կենսաչափական անձնագիր»,– ասաց նա։
Նախարարը նշեց, որ 6–16 տարեկան անձանց համար նախատեսվում է կամարտահայտության սկզբունքով նույնականացման քարտ ունենալու հնարավորություն։ Ինչ վերաբերում է մինչև 6 տարեկան անձանց, ապա որպես անձը հաստատող փաստաթուղթ դիտարկվելու է ծննդյան վկայականը։
Սարգսյանն ավելացրեց, որ բոլոր ճամփորդական փաստաթղթերը թվայնացվելու են։
«Այդ իսկ պատճառով նույնականացման քարտերը կիրառվելու են ներպետական ընթացակարգերում, իսկ անձնագրերը դիտարկվելու են որպես ճամփորդական փաստաթղթեր»,– նշեց նախարարը։
Սարգսյանի խոսքով` աշնանը Հայաստանում ներդրվող նոր կենսաչափական անձնագրերը կարևոր դեր են խաղալու նաև վիզաների ազատականացման գործում։
Օրենսդրական փոփոխությունների այս փաթեթը անհետաձգելի ռեժիմով ներկայացվեց Ազգային ժողովի քննարկմանը։
Sputnik Արմենիա
