ՀԷՑ մասնաճյուղի էլեկտրական ցանցի պետն ու նույն մասնաճյուղի մի շարք այլ պաշտոնատար անձինք մեղադրվում են կաշառք ստանալու մեջ։ Այս մասին հայտնում է ՀՀ հակակոռուպցիոն կոմիտեն «Լուրեր»-ի պատրաստած ռեպորտաժում։
Ըստ կոմիտեի՝ 2006-2025թթ․ ՀԷՑ–ի մասնաճյուղերից մեկի էլեկտրական ցանցի պետը խմբի կազմում, իրեն վերահապահված լիազորություններն ու դրանցով պայմանավորված ազդեցությունն օգտագործելով, ընկերությանը պատճառել է շուրջ 1,3 մլն ՀՀ դրամի վնաս, ինչպես նաև ապօրինի անգործության համար ստացել է կաշառք:
«Մասնավորապես, ՀԷՑ պաշտոնատար անձը, նույն մասնաճյուղի էլեկտրական ցանցի աշխատակիցների և քաղաքացու հետ նախնական համաձայնությամբ, 2024 թվականին կազմակերպել է վերջինիս պատկանող շինության ապօրինի էլեկտրամատակարարման ապահովման գործընթացը, այն է՝ քաղաքացու կողմից ՌԴ-ից բերված այլապատկան հաշվառքային սարքը տեղադրել է նրան պատկանող շինության մոտ գտնվող հենասյան վրա, այն ապօրինի միացրել եռաֆազ հոսանքի լարմանը»,- հայտնում են կոմիտեից։
Կաշառքի դիմաց նաև համակարգչային բազայում չի մուտքագրվել տվյալ քաղաքացու էլեկտրաէներգիայի ծախսը և այլն։
ՀԷՑ պաշտոնատար անձին մեղադրանք է ներկայացվել ՀՀ քրեական օրենսգրքի 277-րդ հոդվածի (մասնավոր ոլորտում ծառայողական լիազորությունները կամ դրանցով պայմանավորված ազդեցությունը չարաշահելը) 2-րդ մասի 3-րդ և 272-րդ հոդվածի (մասնավոր ոլորտում կաշառք ստանալը) 2-րդ մասի 3-րդ կետերով: Մեղադրանքներ են ներկայացվել նաև նրա տեղակալին, ՀԷՑ ևս 2 պաշտոնյայի ու կաշառք տված քաղաքացուն:
Նախաքննությունն ավարտվել է։ Վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան:
Sputnik Արմենիա
