15 տարվա գործունեությունից հետո Թիմ Կուկը լքում է Apple-ի գլխավոր տնօրենի պաշտոնը. նա կանցնի տնօրենների խորհրդի գործադիր նախագահի պաշտոնին։ Այս մասին հայտնել է ընկերությունը: Արդեն սեպտեմբերի 1-ից ընկերությունը կգլխավորի 50-ամյա Ջոն Թերնուսը՝ Apple-ի 25 տարվա փորձառու վետերանը: Թերնուսը ղեկավարում էր սարքավորումների ամբողջ ճարտարագիտությունը՝ iPhone-ից ու Mac-ից մինչև Apple Watch և Vision Pro: «Էկոնոմիստիկա» տելեգրամյան ալիքը գրում է, որ վերլուծաբանները Կուկի հեռացումը գնահատում են որպես մի ամբողջ դարաշրջանի սահմանագիծ:
Ընկերությունը, որը ժամանակին ասոցացվում էր բացառապես Սթիվ Ջոբսի խարիզմայի հետ, նրա ղեկավարությամբ վերածվեց տնտեսական գերտերության, որի կապիտալը գերազանցում է շատ երկրների ՀՆԱ-ն: Այս անցումը նշանակում է ոչ թե ճգնաժամ, այլ առաքելության հաղթական ավարտ՝ օպերացիոն գոյատևումից մինչև գերիշխանություն այն շուկաներում, որտեղ «երկաթը» (hardware), ծառայությունները և էկոհամակարգը որոշում են սպառման և նորարարությունների ապագան:
Կուկը ստանձնել էր ընկերության ղեկավարումը 2011 թվականի օգոստոսին, երբ առողջական վիճակի պատճառով Ջոբսի հեռանալուց հետո շատ վերլուծաբաններ Apple-ի համար անխուսափելի անկում էին կանխատեսում: Նախկին օպերացիոն տնօրենը, լինելով մատակարարման շղթաների մասնագետ, բախվեց հիմնարար մարտահրավերների: Դրանցից գլխավորն էր՝ ապացուցել, որ Apple-ն ընդունակ է աճել առանց հանճարեղ տեսլականի առաջնորդի:
Կուկը չկրկնօրինակեց նախորդի ոճը, այլ կառուցեց համակարգ՝ օպտիմալացրեց արտադրությունը, ներդրեց շահաբաժիններ և բաժնետոմսերի մասնատում (splitting), խաղադրույք կատարեց ծառայությունների վրա:
Նրա օրոք Apple-ը 2015-ին թողարկեց Apple Watch-ը՝ ստեղծելով կրելի սարքերի նոր սեգմենտ, որի արժեքն այսօր տասնյակ միլիարդներ է կազմում: 2020-ին սեփական M-սերիայի պրոցեսորներին անցումը Mac-ին վերադարձրեց մրցակցային առավելությունը, իսկ կենտրոնացումը բաժանորդագրությունների վրա (Apple Music, iCloud, App Store) միանվագ վաճառքները վերածեց կայուն եկամտի: Շուկայական կապիտալիզացիան 2011 թվականի 350 միլիարդ դոլարից աճել է մինչև գրեթե 4 տրիլիոն դոլար 2026 թվականի դրությամբ՝ ավելանալով ավելի քան տասնմեկ անգամ: Տարեկան հասույթն աճել է 108 միլիարդից մինչև 416 միլիարդ դոլար, իսկ շահույթը՝ քառապատկվել:
Ծառայությունները, որոնք 2012-ին բերում էին մոտ 15 միլիարդ, 2024-ին գերազանցել են 68 միլիարդը՝ դառնալով երկրորդ ամենակարևոր դրայվերը iPhone-ից հետո: Apple-ն առաջինն էր պատմության մեջ, որ հաղթահարեց կապիտալիզացիայի 1, 2, 3 և 4 տրիլիոն դոլարի սահմանագծերը՝ դառնալով թվայնացման դարաշրջանում կայուն աճի խորհրդանիշ:
«Էկոնոմիստիկան» նշել է, որ Կուկն ամրապնդեց ընկերության դիրքերը Չինաստանում, Apple-ին դարձրեց տեխնոլոգիական հսկաների շարքում խոշորագույն հարկատուն: Նրա մոտեցումը կայուն զարգացմանը (սարքերում նյութերի վերամշակում) և տվյալների պաշտպանությանը ազդեց ոլորտի ստանդարտների վրա՝ էթիկան վերածելով մրցակցային առավելության: Կուկն ապացուցեց, որ իսկական կայսրությունները կառուցվում են ոչ թե խարիզմայի, այլ համակարգերի վրա, որոնք ապրում են իրենց հիմնադիրներից ավելի երկար։
Sputnik Արմենիա
